ગુજરાતના ખેડૂતોને તેમના પાકના યોગ્ય અને પોષણક્ષમ ભાવ મળી રહે તેવા ઉમદા હેતુ સાથે રાજ્ય સરકાર દ્વારા મહત્વપૂર્ણ નિર્ણય લેવામાં આવ્યો છે. તા. 23 માર્ચ, 2026થી રાજ્યભરમાં ચણા અને રાયડાની ટેકાના ભાવે ખરીદી પ્રક્રિયા શરૂ કરવામાં આવી રહી છે. આ નિર્ણય ખેડૂતોના આર્થિક સશક્તિકરણ અને કૃષિ ક્ષેત્રના વિકાસ માટે એક મહત્વપૂર્ણ પગલું માનવામાં આવી રહ્યું છે. રાજ્ય સરકારના માર્ગદર્શન હેઠળ આ સમગ્ર પ્રક્રિયા માટે આગોતરું આયોજન પૂર્ણ કરવામાં આવ્યું છે અને ખરીદી પ્રક્રિયા પારદર્શક, સરળ અને સુવ્યવસ્થિત રીતે પાર પડે તે માટે વિશેષ વ્યવસ્થા ઉભી કરવામાં આવી છે.
ચણા અને રાયડા ટેકાના ભાવ ખરીદી કેન્દ્રો
ગુજરાતમાં ખેડૂતો દ્વારા કરાવેલી નોંધણી, તેમના વાવેતર વિસ્તાર અને ઉત્પાદનને ધ્યાનમાં રાખીને ચણાની ખરીદી માટે કુલ 165 ખરીદ કેન્દ્રો અને રાયડાની ખરીદી માટે 60 ખરીદ કેન્દ્રો શરૂ કરવામાં આવ્યા છે. આ ખરીદ કેન્દ્રોની વ્યવસ્થા ખેડૂતોને લાંબા અંતર સુધી જવું ન પડે તે માટે ખાસ ધ્યાનમાં રાખીને કરવામાં આવી છે. આથી પરિવહન ખર્ચમાં પણ ઘટાડો થશે અને ખેડૂતોને વધુ નફો મળશે.
ચણા અને રાયડા ટેકાના ભાવ
ગુજરાત સરકાર દ્વારા વર્ષ 2026-27 માટે ચણા અને રાયડા ટેકાના ભાવે ખરીદી 23 માર્ચ 2026 થી શરૂ થઈ રહી છે. ચણાના ટેકાના ભાવ (MSP) પ્રતિ ક્વિન્ટલ રૂ. 5,875 (રૂ. 1175 પ્રતિ મણ) અને રાયડાના રૂ. 6,200 પ્રતિ ક્વિન્ટલ (રૂ. 1,240 પ્રતિ મણ) નક્કી કરવામાં આવ્યા છે, ટેકાના ભાવે રજીસ્ટ્રેશન નાફેડના ઈ-સમૃધ્ધિ પોર્ટલ પર થઇ હતી.
ચણા અને રાયડા ટેકાના ભાવે નોંધણી
ગુજરાત સરકાર દ્વારા વર્ષ 2026-27 વર્ષે ચણા અને રાયડાના ટેકાના ભાવે વેચાણ માટે ખેડૂતોમાં વિશેષ ઉત્સાહ જોવા મળ્યો છે. ચણા માટે 2.59 લાખથી વધુ ખેડૂતો અને રાયડા માટે 37,000થી વધુ ખેડૂતો દ્વારા નોંધણી કરવામાં આવી છે. ચણા અને રાયડા ટેકાના ભાવે નોંધણી કરાવેલા તમામ ખેડૂતો પાસેથી પૂરતી માત્રામાં જથ્થાની ખરીદી કરવામાં આવશે, જેથી કોઈપણ ખેડૂતને નિરાશ ન થવું પડે.
ટેકાના ભાવે ખરીદી પારદર્શિતા
ખરીદી પ્રક્રિયામાં પારદર્શિતા લાવવા માટે આ વર્ષે ખાસ પગલાં લેવામાં આવ્યા છે. નોંધણી કરાવેલા સાચા ખેડૂત પાસેથી જ ખરીદી થાય તે સુનિશ્ચિત કરવા માટે પ્રથમ વખત આધાર ઇનેબલ્ડ બાયોમેટ્રીક અથવા ફેસ ઓથેન્ટીકેશન પ્રક્રિયા અમલમાં મુકવામાં આવી છે. આ નવી વ્યવસ્થા દ્વારા નકલી અથવા ગેરકાયદેસર વેચાણ અટકાવવામાં મદદ મળશે.
ટેકાના ભાવે ખરીદી નોમીની વ્યવસ્થા
ઘણા વખત ખેડૂત અનિવાર્ય સંજોગોમાં ખરીદ કેન્દ્ર પર હાજર રહી શકતા નથી. આ બાબતને ધ્યાનમાં રાખીને રાજ્ય સરકારે નોમીની વ્યવસ્થા પણ અમલમાં મૂકી છે. જો કોઈ ખેડૂત પોતે હાજર રહી શકતો ન હોય, તો તેમના દ્વારા નિયુક્ત કરવામાં આવેલ નોમીની તેમના તરફથી વેચાણ પ્રક્રિયા પૂર્ણ કરી શકશે. આ વ્યવસ્થા ખેડૂતો માટે ખૂબ જ ઉપયોગી સાબિત થશે, કારણ કે તે તેમને લવચીકતા આપે છે અને સમય તથા પરિસ્થિતિ અનુસાર નિર્ણય લેવાની સગવડ આપે છે.
ટેકાના ભાવે ખરીદી SMS
ખરીદ કેન્દ્રો પર ભીડભાડ ન થાય અને વ્યવસ્થા જાળવવામાં સરળતા રહે તે માટે SMS દ્વારા ખેડૂતોને અગાઉથી જાણ કરવામાં આવશે. દરેક નોંધાયેલ ખેડૂતને તેમના પાકની ખરીદી માટે તારીખ અને સમય વિશે મેસેજ મોકલવામાં આવશે. ખેડૂતોને વિનંતી કરવામાં આવી છે કે તેઓ તેમને મળેલા મેસેજ મુજબના નિયત સમય અને તારીખે જ પોતાના પાક સાથે ખરીદ કેન્દ્ર પર હાજર રહે. આથી વ્યવસ્થા સુચારૂ રીતે ચાલશે અને ખેડૂતોનો સમય પણ બચશે.
ટેકાના ભાવે ખરીદી પ્રક્રિયા માર્ગદર્શન
ટેકાના ભાવે ખરીદી પ્રક્રિયા દરમિયાન ખેડૂતોને કોઈ પણ પ્રકારની મુશ્કેલી ન પડે તે માટે માર્ગદર્શન અને સહાય પણ ઉપલબ્ધ કરવામાં આવી છે. ખરીદ કેન્દ્રો પર અધિકારીઓ અને સ્ટાફ દ્વારા ખેડૂતોને જરૂરી માહિતી આપવામાં આવશે.
આ ઉપરાંત, હેલ્પલાઇન નંબર અને ઓનલાઈન સુવિધાઓ દ્વારા પણ ખેડૂતોને સહાય આપવામાં આવશે, જેથી તેઓ સરળતાથી પોતાની સમસ્યાઓનો ઉકેલ મેળવી શકે.
ચણા અને રાયડાની ટેકાના ભાવે ખરીદી પ્રક્રિયા શરૂ કરવાનો રાજ્ય સરકારનો નિર્ણય ખેડૂતો માટે ખૂબ જ લાભદાયક સાબિત થશે. આથી ખેડૂતોને યોગ્ય ભાવ મળશે, તેમની આવકમાં વધારો થશે અને કૃષિ ક્ષેત્રમાં સ્થિરતા આવશે.
આ સમગ્ર પ્રક્રિયામાં પારદર્શિતા, સુવિધા અને ટેકનોલોજીનો ઉપયોગ કરવામાં આવ્યો છે, જે આ યોજનાને વધુ અસરકારક બનાવે છે. ખેડૂતોને વિનંતી છે કે તેઓ સમયસર પોતાના પાક સાથે ખરીદ કેન્દ્ર પર હાજર રહે અને સરકારની આ યોજનાનો પૂરો લાભ લે.
ગુજરાતી કૃષિ સમાચાર અને સરકારી કૃષિ સમાચાર ના લાંબા અનુભવ સાથે ખેતીવાડી ન્યુઝ માહિતી પુરી પાડે છે.